Məşhur şokolad şirkəti "Ferrero” "Kinder Surprise" yumurtalarını yığışdırmaq qərarına gəlib.

Bildirilir ki, buna səbəb həmin şokoladlarda "salmonella” bakteriyasının aşkarlanması olub.

Bildirilib ki, təsirə məruz qalan məhsullar son istifadə müddəti 11 iyul 2022-ci il və 7 oktyabr 2022-ci il tarixləri arasında olan 2 partiyanı əhatə edib. Böyük Britaniya Qida Standartları Agentliyinin rəsmisi Tina Potter, "Bilirik ki, bu məhsullar kiçik uşaqlar arasında populyardır, xüsusən də, Pasxa bayramı ərəfəsində. Buna görə də uşaqların valideynlərini və qəyyumlarını evlərindəki məhsulların geri çağırılma əhatəsində olub-olmadığını yoxlamağa çağırırıq", - deyə söyləyib.

"Kinder Surprise”lərin istehsalçısı "Ferrero” şirkəti də açıqlamasında üzərində həmin istifadə tarixləri olan məhsulların yeyilməməsi və geri qaytarılmasını istəyib.

Qeyd edək ki, İngiltərədə sözügedən bakteriyaya 63 nəfər yoluxub. Onlar arasında 5-6 yaşlı uşaqların olduğu bildirilib. İngiltərədən başqa İrlandiya, Fransa, Almaniya, İsveç və Hollandiyada "salmonella”ya yoluxma hallarının görüldüyü açıqlanıb.

"Salmonella”nın simptomlarına ishal, ürəkbulanma, qusma və qızdırma daxildir. Əksər hallarda simptomlar bir neçə gün ərzində yox olsa da, xüsusilə gənclər və immun sistemi zəif olan insanlar üçün xəstəxanaya yerləşdirmə ehtiyacı yarana bilər. Həmçinin vaxtında müalicə edilmədiyi halda, salmonella ölümcül tifo xəstəliyinə çevrilə bilər.

Azadsoz.com

• Teqlər:
• Ferrero
• KinderSurprise